Кэлэр 2025 сылга саха биллиилээх судаарыстыбаннай, бэлитиичэскэй диэйэтэлэ, ССКП обкомун бастакы сэкэритээринэн 17 сыл устата ситиһиилээхтик үлэлээбит, Саха АССР сайдарыгар сүҥкэн кылаатын киллэрбит, билиҥҥи сайдыы оҥкулун уурбут Гавриил Иосифович Чиряев төрөөбүтэ 100 сыла киэҥник бэлиэтэниэ.
Гавриил Иосифович Чиряев Кыадаҥдаҕа Ураһалаах алааһыгар төрөөбүтэ, оҕо сааһа ааспыта. Кэрэ-бэлиэ түгэҥҥэ бэлэмнэнэн Бүлүү улууһун, «Чочу нэһилиэгэ» МТ дьаһалталара биллиилээх биир дойдулаахтарын аатын үйэтитиигэ тэрээһиннээх үлэни ыыталлар. Ол иһинэн быйылгыттан Гавриил Чиряев төрөөбүт өтөҕөр буруус дьиэ тутуута саҕаланна.
Петр Догоюсов баһылыктаах Чочу нэһилиэгин дьаһалтата саха биллиилээх судаарыстыбаннай, бэлитиичэскэй диэйэтэлин аатын үйэтитиигэ АЛРОСА хампаанньаны кытта үлэлэһэн, 7 мөл. солк. суумаҕа сөбүлэһии түһэрсибитэ.
Ааспыт сайын Чочу нэһилиэгин дьаһалтата Кыадаҥдаттан Ураһалаахха диэри 4 км устаалаах суолу «Востокснаб» тэрилтэни кытта быһа кэпсэтэн оҥорторбута: суолга кумах кутуллубута, уу ааһар турбата ууруллубута.
— Ааспыт сайын Гавриил Иосифович Чиряев өтөҕүн күрүөтэ-хаһаата оҥоһулунна, киириигэ тимир арка туруорулунна. Гавриил Иосифович Бүлүүгэ көһөрөн киллэриллибит дьиэтигэр майгынныыр 7,5*7,5 кв м буруус дьиэ тутуута саҕаланна. Дьиэни аукциоҥҥа кыайбыт «Сахапромстрой» тэрилтэ тутар, — диэн Чочу нэһилиэгин баһылыга Петр Догоюсов билиһиннэрдэ.
Ити курдук, Чочу нэһилиэгин дьаһалтата Гаврил Иосифович Чиряев төрөөбүтэ 100 сыллаах үбүлүөйүн дьоһуннаахтык көрсөргө бэлэмнэнии үлэни күргүөмнээхтик ыытар.
Николай Куприянов
Источник: https://xn--80avakbauqq.xn--p1ai/gavriil-chiryaev-tereebyt-ete5er-die-tutuuta-sa5alanna/
